Leubeh ambia nyata mukjiza
Tuhan hazharat yang bri mulia
Nyata bukti tinggi martabat
Tanda alamat rasul mulia
leubeh ibrahim yang halim sangat
Hana tutong jasat lam apui raya
Kulet han bicah tuboh seulamat
Didalam ayat tuhan peunyata
Leubeh di yusuf peutoh peundapat
Meufhom ibarat yang akan nyata
Dum takbir leumpoe meuhoe isyarah
Dan lagi hebat indah that rupa
Leubeh di daud patot meugah that
Suara mangat hana ngen peusa
Teuboh pie teuga kuasa kuat
Sanggop neulipat beusoe meulila
Leubeh di musa na naga tungkat
Lawan sang kilat kafee barhala
Lam laot luwah leupah neulewat
Karam dum rakyat fireu’un raja
Leubeh sulaiman peutimang rakyat
Putoh makrifat seugala bangsa
Euncien bak jaroe peudo malakat
Bandum lat batat di akue raja
Leubeh di isa nyata alamat
Ureung saket brat puleh ngen sigra
Buta ngen supak karusak jasad
Ureung lam jeurat pie hudep teuma
Leubeh Muhammad rahmat dum lengkap
Keunan menghadap bandum ambia
Beuleun limong blah beukah ngen siat
Dengan isyarah beukah keu dua
Leubeh mulia nyata syafa’at
Keupada ummat di yaumil mahsyar
Jadi teuladan ajam dan arab
Alamat leungkap ban sigom donya
Hadapan Allah leupah beurangkat
Malam neumekreut lailatul asra
Kitab al-qur’an jalan syari’at
Sampoe kiamat meu ubah hana
Tags:
Uni
Ball
80
alquran
islamic
